味家 韓國餐廳 (已結業)

之前屋企人幫襯過上環梨花園食韓國菜，今次因為起學校執到一張$100的消費券宣傳單張(要消費滿$300)，所以我同阿媽阿婆上去試下。今次叫左烤雞肉($9X)、年糕($6X)、烤肥肉(應該係豬肉, $9X)及泡菜薄餅($9X)。消費滿$200就可以用$8食泡菜豬肉薄餅，今次有叫一客試下。正餐前先上小食，有韓國泡菜、菜、番瓜餅兩個、芽菜、薯仔(開頭以為係蘿蔔)、酸蘿蔔絲及雜菜沙律。味道一般。肥肉係急凍肉，所以上碟時仲有一層冰。一碟四塊，服務員會問你要唔要剪開幾塊。烤要睇準時間，烤得太耐肉會硬。味道OK。烤雞肉因為只有150G，所以幾細碟，上面有兩舊菇。雞肉無梨花園咁好食，但菇口味唔錯。年糕味道一般，份量好細，雖然有紅辣椒，但完全唔辣、反而有少少甜味。泡菜豬肉薄餅每桌只可以用優惠價叫一個，size比正價泡菜薄餅細。食落口感唔錯，但因為泡菜味遮住，所以唔覺有豬肉味，豬肉絲真係唔多。唔計加一總共食左$360。賣單後有西瓜及紅棗茶。西瓜幾甜，但屋企人覺得紅棗茶太甜。餐廳好多服務員係韓國人，未必可以講好流利中文，有時會用英文溝通。食物味精幾勁，返屋企勁飲水。