采蝶軒 (已結業)

星期日下午無聊之際,睇番自己d相冊,發現有一餐特別晚飯係無寫過,雖然已經係舊年既事,都以呢餐作為小妹第300個食評。去年4月底某個晚上,小妹同一群好友浩浩蕩蕩走入呢間采蝶軒貴賓房晚飯;雖然係坐房,服務又唔見得特別好,唯一好處就係夠晒私隱。阿頂叫左個套餐,幸好當時有影每道菜,所以記得菜式同味道--醉翁蝦:現場泡製時酒味充斥房間,未食已經醉左大半。每人2隻大蝦,蝦肉係好爽口帶點酒味。青欖白肺湯:連一大碟湯渣上檯,用料有好多粒青欖,唔少既豬肉、豬肺,味道酸酸地好特別,而且話好有益!!蜜豆星斑片:一般味道啦,唔太特別。京烤骨配小饅頭:記得呢道菜味道好甜,用d汁點小饅頭幾好食。海蔘炆鴨掌:都係一般炆海蔘味道,又係唔太特別。蟹肉莧菜:新鮮蟹肉份量好多,加埋新鮮莧菜,清淡之選。海鮮炒飯:炒飯顏色黃黃,飯粒分明,頗多帶子粒(起碼我個碗係)。生果拼盤:記憶中各樣水果都幾清甜,ok既。砵仔糕/楊枝甘露/豆沙鍋餅:甜品反而自己最鐘意,砵仔糕口感軟綿,楊枝甘露最好味,可以encore最好,鍋餅較油但都ok。呢餐價錢對我地黎講係相當貴,但對於比錢個位就只係九牛一毛,多謝晒啦!!