珍味泉越南粉 (已結業)

公司喺葵興，今日一早番去計數，路過珍味泉，食個早餐先！通常一返公司都會喺呢間食肆食個晏又或者整個下午茶，食番個越式粉麵飯，而我叫得最多嘅一定係下面嘅生牛肉河粉早餐: 生牛肉河粉+凍檸茶走甜 (HK$35)佢地雖然係up dup 巷仔鋪，但係出品一啲都唔馬虎，湯係用牛骨煲嘅，加入左一啲我估計係桂皮、八角及胡椒之類嘅香料，仲有就係佢地呢個湯好重魚露味，我問過佢地呢度事頭婆，佢地呢個越式湯底係唔加鹽，只係用一啲幾十蚊支嘅魚露調味，真係好揼本！唔似有啲叫話什麼東南亞菜館，用埋啲垃圾雞湯嚟做生牛河湯底。牛肉同埋配料都好正宗，牛肉好焾滑，事頭婆話佢呢隻貨要四十幾蚊一磅，一睇就知係肉眼，應該係澳紐貨，因為美國肉眼一般都比較肥，做生牛河太肥膩！配料一啲唔馬虎，金不煥、洋蔥、青蔥、辣椒樣樣齊，冇偷工減料！河粉係行貨，但唔差，相當軟滑！至於杯檸茶，真係合理濃茶再加三塊有2-3mm厚嘅檸檬，唔似得有啲早餐賣到懶係平嘅地方咁，茶無茶味，檸檬薄過張紙！總結： 呢度係一間好有誠意嘅食肆，食物價錢大眾化得嚟又一啲都唔差！仲要特別一提佢地事頭婆，非常親切健談，同佢傾計，絶對冇話收收埋埋，食物材料配方、佢以前做生意經歷