蘭香茶餐廳 (已搬遷) 新店位置

星期六去荃灣配藥,順道行過黎食野,本來都諗住試嘉樂,但見門口有人排隊,以我懶惰性格又點會排??行過2間舖位食蘭香。幸運地進佔卡位一大張,望下餐牌唔駛十秒,已經同哥哥落單:B餐要炒蛋、凍奶茶唔該!! 火腿炒蛋: 火腿數闊片,加埋應該有一整片洋火腿,望落就無煎過喇;炒蛋一大堆,當然無澳牛咁正,不過都OK既,但多油囉!!牛油多士: 麵包幾厚身,烘得夠金黃,牛油份量剛好,味道唔錯,加片炒蛋變炒蛋多,正!叉燒會意粉: 叉燒數片係碟底,我初初都以為齋茄汁意添,叉燒都有少少蜜味,唔係乾乾貨色,ok; 意粉係一貫港式茶餐廳做法,口感偏淋,都有炒過(因為見到有d意粉有少少燶邊);茄汁偏甜,加上粟米、紅蘿蔔、青豆各一粒(每樣都真係只有一粒!!)味道唔算太好,但食落好有童年回憶!!凍奶茶: 茶味唔濃,又係不過不失質素,麻麻地。服務方面,有位似乎係太子爺既四眼哥哥仔走足全場,佢真係一眼關七,速度一流!!而且記性好好,落單唔駛寫,齋用口講都無錯到,勁!!呢個餐本來係好抵食,廿蚊有齊咁多野,但係凍飲要加$2.5就貴左少少lu =p細個住荃灣時經常黎呢頭食野,如無意外,蘭香/嘉樂都應該有幫襯過;呢頭都變左好多lu,