百味閣餐廳

营业中

休息中

木造趟門、七彩教堂玻璃、格仔抬布、枱面有小樽花瓶、牆身掛有老香港嘅人、事、物……廳內播放西洋民歌……這種傳統西餐廳越來越少……今日途經九龍塘浸會大學，終於一嘗到這間䇄立廿三年，衹此一家，充滿人情味、滿載昔日情懷嘅西餐、堅果撻……由於鄰近大學區、平日好多時會有人包場搞謝師宴、生日會、聚餐……老闆娘話試過有人在此求婚……之後重臨此地慶祝結婚週年……講返今晚嘅西餐……點了法式龍蝦湯、磨菇三文魚籽伴帶子、香草檸檬烤焗石斑魚。龍蝦湯超濃郁，有啖啖龍蝦肉，正！帶子大大粒、上面撒上魚籽，卜卜卜，肉質彈牙兼與醬汁超夾，好食！至於石斑魚，係原條用錫紙密封烤焗，經理話係法式烹調，打開之時香氣撲鼻，用刀叉起肉，伴以香草檸檬汁，仲有D酒香辟腥，呢種食法好得意，食落有D似中式蒸魚，但又保留西餐烤焗法，令我諗起細個時郊外BBQ，一齊煑餐嘅回憶……臨走時，老闆娘仲話餐廳會不時製作特色餅食，如呢個焦糖堅果撻，用咗夏威夷果仁、南瓜籽、腰果、杏仁 、紅莓乾和提子乾 ，落足料加香脆撻皮，面頭醮上焦糖甜甜地，中間紅莓帶微酸，口感豐富，值得一嘗！老闆娘話佢地以成本價回饋熟客，由於製作需時、限量供應，想食最好預訂咁話！