一粥麵 (滙景廣場)

营业中

休息中

薑絲牛肉通粉，炒滑蛋，煎蘿蔔糕配凍豆漿就係呢日嘅早餐。原本打算叫凍奶茶，被收銀員告知要加$5，建議我不如加$1飲凍豆漿，呢個暖心行動，值得表揚。呢間快餐店另一個窩心舉動係會加多杯水，而唔係好似同系嘅大家樂咁要自己斟。另外，呢間食店配蘿蔔糕係用辣椒油而唔係好似大家樂咁用辣椒醬，兩者分別係前者有辣椒香味，不帶酸味，後者會有啲酸味，所以站起我嘅角度，辣椒油配蘿蔔糕，辣椒醬配乾炒牛河會比較合適。講返味道，蘿蔔糕味道當然同家庭版無得比，但算係正常，而我第一次蘸辣椒油食，發現原來非常夾味；炒蛋帶有濃濃嘅牛油味，好香好滑，帶畀我意外驚喜；通粉食到有薑汁味，但唔會過重，牛肉雖然係雪貨，但勝在肉質鬆軟無筋，通粉係同老麥及大家樂一樣，都係同一款式嘅螺絲通粉，但煮得剛剛好，唔會好似老麥咁易斷；湯飲唔出有雞粉湯味，所以即使我一飲而盡，都唔會口渴，抵讚！$33有咁嘅質素同窩心行為，絕對滿意，而我嘅好評唔單只畀食物，更係畀收銀員嘅。