得如酒樓 (已結業)

要還人情債，下午落新填地街幫朋友做左幾個鐘，佢話未食飯，就同佢一齊去搵食。唔經得如，佢問我試過未，名聽過但就未試過，就來吃一吃。樓下有唐餅賣，仲有果部人咁高的橙色磅，加上一檯一個痰罐，淨睇呢幾樣野就知這裡絕對是本地的文化遺產之一。客人多是上了年紀的或打赤膊的勞動階層，大半人在吞雲吐霧，是非常典型的舊式茶樓的場景。四點幾已經無晒點心，唯有沖壺普洱叫碟頭飯，佢叫了火腩斑塊，我就叫了碗瓜粒湯飯湊下熱鬧。即叫即製熱辣辣，可能吃的也是靠勞力搵食的朋友，碟頭都不少，朋友的那碟飯兩個人分吃也會夠飽。水準不是十分高，料足而不是正貨，亦有味精的點綴，我的瓜粒湯飯比不上蓮香的，但已交足功課。價錢都係三、四十蚊，都可算是抵食的街坊茶樓。檯面、檯布、餐具、廁所的衛生水準還是停留在廿多年前，一些對上述東西有嚴格要求的真的不要來試。但我來說就沒有所謂，志在一試，都可以體會一下地道舊式茶樓的味道。況且如其他食家話齋，呢度隨時會拆，始終呢類舊式茶樓已買少見少。