福岡漢堡扒 (厚福街) (已結業)

福骨漢堡扒一聽個名以為係日本，原來係來自韓國。今次同朋友叫左個情侶推介二人套餐，包括一個菠蘿煙肉和牛漢堡扒、芝士蛋蒜和牛漢堡扒、芝士泡豚丼飯，另外我叫左2杯特飲，包括西柚特飲同百香果特飲。我未試過石燒和牛漢堡扒，覺得好新奇，佢鐵板隔離有舊細熱石，亦都有配個鏟，個鏟同舊石既size差唔多，枱面有一個吸油煙既管，所以位置相對唔算太多，好彩個鐵板都好細，放得晒套餐d野食。首先鏟少少肉，放在熱石上，再用鏟壓一壓，d肉未熟時會痴住個鏟，鏟舊肉反邊既時候要小心，我朋友係咁鏟走左舊肉落枱面，笑死！兩款和牛漢堡扒好滑，油份好充足，冇太多調味，所以佢有加配左泡菜、鹽、醬油調味，加上有蛋同芝士在底底，加埋一齊食味道唔錯，不過熱石過一陣就會變凍，店員都主動會幫手換石既。朋友食既菠蘿都幾特別，放在熱石上似燒菠蘿咁。芝士泡豚丼飯味道唔錯，芝士份量充足，泡菜勁多，d肉都勁有味道，飯量多到2個人都食唔晒XD 特飲方面勁大杯，係梳打水黎，非常打卡able!