我哋六個人本身想食炭燒乳豬，但係想試吓其他菜好唔好食先，先至叫多啲人嚟一齊試乳豬。
我哋叫咗個小食拼盤，有蝦餅魚餅雞翼蟹鉗咖喱角雞卷，樣樣都係炸，唔錯。
跟住有個無骨鳳爪沙律，酸辣啱好，好開胃。
另外叫咗個火山排骨，真係好大盆，又係酸酸辣辣咁，啲骨側邊啲肉黐住啲骨嗰啲好正。
炭燒串燒，佢哋係喺出邊有泰國師傅喺出邊炭燒，當然好正啦。
泰國椰菜苗加脆肉，正常發揮。
跟住叫咗個金枕頭竹炭咖喱麵包軟殼蟹，見佢叫得意所以叫，一嚟到真係超大份，咖喱滑身，軟殼蟹脆卜卜，加埋個竹炭麵包又係脆卜卜，呢個真係必叫。
仲有叫咗豪仔煎蛋，都好多蠔仔都係新鮮，熱辣辣嘅鐵板加埋煎蛋，點埋個士拉差辣椒醬真係好食。
我哋六個人埋單先每人$220，有咁嘅份量認真抵食！
