番本日式放題 (已結業)

由於表妹之前食過話覺得幾好，有鮮象拔蚌任食同埋有粥底蒸氣火鍋，咁啱今晚我們約咗個朋友食飯，而佢又想食日式放題，所以我們就去咗旺角西洋菜南街嘅「番本日式放題」食晚市放題！我們首先叫咗個雜錦刺身拼盤，當中嘅新鮮象拔蚌真係超新鮮爽甜，赤貝亦都係好爽甜，北海道帶子好鮮甜嫩滑，由於真係好正，所以我們再叫多一盤嚟食，之後都仲覺得好想再食，所以我們又再叫多一盤！值得一讚嘅係我們總共叫咗三盤，但他們每次都係會出足夠我們叫嘅份量出嚟，而且態度仲好友善咁，唔會黑面話我們叫咗幾次而減少出嚟嘅份量，真係值得讚賞！和風珍味浸白蜆嘅味道都幾清甜！和風牛肉粒嘅肉質有啲實，唔算太鬆軟，但肉味都幾濃郁！至於蒸氣火鍋我們就叫咗爽甜彈牙嘅新鮮海中蝦，鮮味彈牙嘅半殼帆立貝，鮮甜嘅活口沙白蜆，香滑嘅肥牛片同香甜軟滑嘅日本南瓜片，所有嘅精華都落晒粥底入面，令到粥底嘅味道相當鮮甜！