日月星快餐 (已結業)

其实今日已经系第四次食鸡脾下午茶餐，我依然忍唔住讲：真系好大只鸡脾！记得初次路过商场外，我被白底红字”日月星”招牌吸引，充满电视剧“香港8x”feel,后来上网搜查原来生炸鸡脾远近驰名，胃食嘅我当然要一试。我通常会非繁忙时段，平日下午三四点左右帮衬，但我经验系就算非繁忙时段，总会有鸡脾粉丝聚集（中年男性居多，无性别歧视成份），互不相识但大家同样手持卤水脾或生炸脾密密食，都几得意！讲返正题，我每次心水必定系鸡脾+火腿三文治下午茶餐（$23），包热饮，生炸鸡脾大大只，热辣辣，脆卜卜，但又唔会炸到干哂，咬落真系有肉汁流出（唔系油或血水），三个字：正！如果嫌炸鸡脾热气，卤水鸡脾亦系一个好选择，鸡皮吸收卤汁后肥美甘香，卤水汁味道适中，唔会太重八角草果香料而觉得食后上火口干。论价钱火腿三文治ok好食，原来亦可以加$3改为肠仔热狗，我未食过但应该好味，因为曾经见过隔离位中年男士大啖咬热狗，沙律酱从咀角流出，一脸满足……热饮例如奶茶，华田都好饮。既然食鸡脾，当然唔少得食埋炸薯条（$11?)，大大碟波浪纹薯条炸得香脆，洒盐热食一流！