點心到 (鴻星大廈)

营业中

休息中

唔知幾時開始，點心到已經成為咗我同屋企人嘅飲茶之選，大大話話食咗四五次都唔厭。燒汁釀虎皮椒係我每次必點，魚肉足料彈牙，煎得好香口。 其實釀茄子都好食，但虎皮椒更加惹味，正過普通煎釀三寶好多皮。沙律明蝦角酥脆皮薄，同平時炸雲吞得一粒仔餡唔同，呢個明蝦角有差唔多兩隻蝦餃嘅蝦量，爽口彈牙好滿足。叉燒腸腸粉皮晶瑩透亮，叉燒都唔錯唔會乾。 平時食開齋腸加混醬都好正，成家人爭住食。鳳爪同金錢肚好惹味，鳳爪炆得好腍，大大件食得好過癮，我自己輕鬆啪哂成籠。燒賣正常發揮，勝在大大粒，仲有原隻蝦係面。馬拉糕蒸得岩岩好，唔會太腍或者太濕，甜度剛好。黑金流沙包流到好似食緊小籠包咁，望少眼都流到成手都咸蛋黃，非常邪惡，岩哂我。榴槤雪媚娘都係必點，皮薄餡靚，真係包左真材實料嘅榴槤蓉，食一啖把口已經好臭。 留意到唔同分店嘅做法都有少少唔同，旺角店比較多cream，佐敦店同油麻地店就啖啖榴槤肉，一流。