蟹仙海鮮蒸氣鍋 (龍崗道)

营业中

休息中

天寒地凍嘅日子，約埋朋友去屋企附近食海鮮蒸氣鍋。呢間係九龍城龍崗道嘅「蟹仙海鮮蒸氣鍋」，閒日唔算多人，坐得好舒服，有唔同套餐選擇，客人可以按自己喜好嘅海鮮選擇，豐儉由人，店員都有強調佢哋嘅海鮮每日新鮮到港，絕對優質。今次選擇左尊貴海鮮套餐。套餐HKD419一位，有十道菜：包左綠膏蟹、龍躉片、澳洲青年龍蝦、台灣九孔鮑魚、大西洋青口、野生海虎蝦、斧山珍珠蠔、刀貝蚌、大元貝同有機蔬菜。店員會按味道由淡至濃，將各款海鮮放落蒸氣鍋蒸煮，憑佢哋嘅經驗，每一款海鮮都蒸得恰到好處。今次呢個套餐大堆介係綠膏蟹、龍蝦同九孔鮑魚：綠膏蟹大隻有肉，蟹味香濃鮮甜；龍蝦夠新鮮，可以整條蝦肉脫殼，肉質結實而彈牙；鮑魚有佢嘅鮮味，毋需任何醬油調味，已夠鮮味，加上爽口彈牙嘅口感，唔錯。海鮮蒸氣鍋點少得海鮮汁煮成的粥底，粥水配上粟米、菜脯、香蔥等配料，鮮味又暖胃。最後，仲有甜品椰汁雪燕作結。大滿足嘅用餐體驗。