Chotto Maki (廈門街) (已結業)

女兒知我喜歡食刺身壽司，知道灣仔有一間主打創意壽司的Chotto Maki，好想同我去試吓。但因為工作太忙冇時間，就叫我去買外賣返屋企食。店內左邊設有堂食，師傅就在右邊的開放式廚房為客人製作食物。餐牌上有多款不同口味的材料做出不同配搭的壽司飯卷。分4件和8件。還有豐富的套餐選擇。（604）Crunch:材料有三文魚、混合蔬菜、蘆筍、玉子、天婦羅、櫻花蝦。三文魚肥美有魚油香味，配蘆筍蔬等口感爽口，加左黑芝麻和芥末醬汁，味道好夾，灑上櫻花蝦更添鮮甜味！Sea Monster:有蟹肉棒絲、天婦羅蝦、青瓜絲、櫻花蝦、炸蒜片、甜薯蓉。蟹棒和青瓜均切成幼絲，加埋天婦羅蝦，口感爽脆鮮甜，鰻魚汁和自家製醬汁混合得好好味，櫻花蝦帶甜味，令味道提升！Mango Dynamite: 有天婦羅蝦、青瓜、芒果、綠色飛魚子。青瓜和天婦羅蝦都爽脆，第一次食綠色的飛魚子，一樣有口感，芒果味甜，配鰻魚汁都好夾好好味！Black Magma: 有碎扇貝、蔥花吞拿魚蓉、天婦羅，帶有蔥花的吞拿魚蓉特別香甜，扇貝碎也有鮮味，天婦羅脆口，配黑芝麻醬汁味道好夾好惹味！唔想飲汽水就要咗碗味噌湯，有順口細緻的風味。