喜多嬉牡蠣屋 (已結業)

因為朋友好鍾意食生蠔，留意到呢一間生蠔放題好出名，就一齊去試吓！一入到去，服務員已經好熱情招呼，服務態度好好。我哋就叫咗一個套餐，咁就唔使諗又乜都可以試吓。首先登場係海鮮湯。雖然細細壺，但好多蜆肉同蝦肉熬製，鮮味非常出色，又唔會過鹹。加上用小蠟燭火㷫住，全程都熱辣辣，用心！然後就上炸牡丹大蝦，手板咁大隻，蝦頭又膏，好正。懷石八品體現日本料理精神：精緻漂亮，個好似藝術品咁。店員亦好細心介紹用咩次序食最能夠食到每一品料理嘅原味。每一品嘅口感同味道都相當唔同又配合得好，一次過滿足晒所有願望。當然就要去到主角：生蠔！唔係話好大隻，但就每一隻都好新鮮！加埋店家獨有嘅柚子醬同埋醃蘿蔔蓉，加上檸檬汁，更加帶出生蠔嘅鮮味：四個字，回味無窮！重點係可以任食！當然我哋到時試埋各式焗蠔，扇貝，同埋串燒，每一樣都好好味，火候剛剛好！加埋烏冬，甜品⋯ 大滿足。餐廳無論睇服務態度，食物質素，都非常滿意，值得再來。