劉興記生煎包專門店

营业中

休息中

今日到訪呢間最近喺網上爆紅嘅小店，主打多款上海菜式，當中以爆汁生煎包為招牌。旺角分店唔算好大，裝潢簡約，有卡位坐，比想像中更加闊落。整體食物價錢親民，晚上要排隊，想食又唔想等嘅建議早啲去啦～ 一坐低就order咗生煎包，現時有兩款口味，包括招牌，即豬肉餡同蟹黃。包底煎至金黃酥脆，咬落爆汁，熱到辣口，豬肉肥瘦適中，混合蟹粉同蟹肉味道更鮮甜。店內仲寫著「無爆汁可免費更換」，不過睇怕冇呢個機會啦🤣除咗生煎包都試咗唔少特色小食，推介生炸雞扒，肉嫩香脆，性價比高。糖醋同上海炸排骨都唔錯，個人更喜歡後者，酸甜可口，減低油膩感。雞絲酸辣湯酸多過辣，滿滿餡料都幾飽肚。另外有主食供應，私心推介麻醬手撕雞絲粉皮，用上三黃雞，人手撕肉，一絲絲完全唔乾柴，粉皮滑嘟嘟，唔夠味亦可以叫店員加醬。蔥油拌麵份量好多，麵條幼滑，偏鹹。蔥油餅一開四，外脆內多蔥，大人小朋友都鍾意。最後飲埋杯豆漿，解膩消暑，讚。