杏花樓甜品 (已結業)

早幾日唔知食咩好, 於是乎就不斷遊街, 邊行邊搵野食, 最後行到黎呢度, 見到呢間食店, 師傅心諗以前都經常黎食, 雖然唔係呢間, 但反正都咁耐冇試過, 不如入黎醫下肚啦!入到去見到地方都幾大, 環境都算清潔, 搵個位坐底就叫野食喇! 商量一輪後, 決定叫一客黑椒雞扒, 一客粟米班塊, 今次兩個客飯要左白飯, 冇要菜飯, 要左餐茶冇要甜品, 再加多一碟蘿蔔糕!等左一陣黑椒雞扒首先送上, 黑椒雞扒得一塊雞扒, 唔算好大, 不過就勝左斬件上, 雞扒好鬆好腍, 食唔到有雪種味, 而黑椒汁好香好辣, 送飯一流, 不過黑椒汁就少d; 粟米班塊有四塊班塊, 班塊就煎得好香, 一d都唔腥又冇雪種味, 而粟米汁好甜, 都幾好味; 蘿蔔糕一碟兩件, 幾厚身不過就冇咩蘿蔔味, 呢個唔算好味; 餐茶要左熱檸茶, 熱檸茶檸檬味唔係好夠, 茶味又唔濃, 一般!總括黎講呢度選擇都幾多, 配搭都幾多, 可以要餐茶又或者可要甜品, 而個客飯都整得幾好味, 三十五蚊師傅都覺得可以, 下次都會再黎呢間甜品餐廳, 到時順便試埋佢地d甜品!