大瀛喜日本料理 (已結業)

由於媽咪正日生日嗰日我們已約咗Oppa慶祝，所以3姨媽同表妹就提早喺今晚同媽咪慶祝！我們揀咗去旺角MPM文華商場嘅「大瀛喜日本料理」食晚市放題！一開始我們就當然叫咗個雜錦刺身拼盤嚟食先啦，一上碟嗰陣我們都嘩咗出嚟，因除咗刺身嘅款式都幾多，同埋好新鮮之外，仲有一「嚿」瀛字嘅冰雕，令到賣相更加精緻吸引！當中嘅油甘魚同劍魚腩肉質相當爽滑肥美，而且充滿魚油嘅香味！海膽手卷係迷你版，可以一口成個食晒，海膽嘅味道都幾鮮甜新鮮，唔會有「臭壓」嘅味道！蟹粥嘅粥底算不過不失，唔會好似其他店咁，會整到比漿糊更加「稠」身咁！鮮茄濃湯烏冬嘅湯底都幾鮮味濃郁，至於烏冬嘅麵質就比較腍身，唔係好彈牙！和風帆立貝嘅味道除咗有帆立貝本身嘅鮮味之外，仲有微微嘅牛油香味，而且都幾大粒！至於甜品方面除咗有基本每人一杯雪糕之外，仲有芝士蛋糕、泡芙、焦糖燉蛋同奶凍等等等等⋯⋯另外仲有乳酪同雪糕糯米糍擺放喺自助區畀人客選擇，款式種類真係好多，啱晒最鍾意食甜品嘅表妹！