我係一個超中意飲酸辣湯既人，一黎就點左個酸辣湯，例牌唔係好貴，三十幾蚊，個人覺得酸味較多，唔係好辣，配料都好多，比較「杰」唔太稀。之後叫左個炸雞扒擔擔面，擔擔面我地叫左中辣，中辣都唔係太辣，仲可以飲到啖湯！擔擔面𠴱種係麻麻既辣，花生碎同酸菜都搭配得唔錯！炸雞扒份量多，但炸粉比較厚，雞扒偏咸。
鮮肉鍋貼有三隻，千萬唔好放凍左先食呀，熱辣辣時一咬，入面既肉汁漏出黎！！鍋貼皮唔厚都可以完全包住豬肉。而我最愛就係蟹粉小籠包，佢比起普通小籠包貴一個double，但都忍唔住要食，小籠包皮薄，但夾起唔會穿，仲可以望到入面個餡，真正皮薄餡靚！我本以為蟹肉會好咸，但唔係喎，將蟹肉同豬肉撈埋一齊，味道仲更加鮮濃。
最後點左賽䠙蟹同豆腐鮮魚羹，賽䠙蟹配上大蝦，今次我地唔落醋，想試下佢既鮮味，唔加醋都無乜問題喎，蛋白好滑，配上蟹肉同蝦，味道很好。鮮魚羹我覺得比酸辣湯更出色，魚肉一d都唔霉，顯然係新鮮既魚肉，個羹略帶d咸，豆腐同魚肉既份量都好多。
樣樣都好味，但我都係中意蟹粉小籠包，黎夏麵館必食呀！
