心之食堂 (裝修中)

星期六夜晚同朋友去銅鑼灣呢間心之食堂食吓日本野，我地去到既時候已經係9:00pm但店入面仲係幾乎full曬我諗如果要晚飯時間嚟就應該要等吓位啦。我同朋友兩個人嗌咗好多野，第一次上既係兩杯野飲，一杯係荔枝清酒另一杯係乳酸飲品，兩杯都係偏紫色影相好靚💜-食物方面，我地叫咗蒜片牛柳粒石鍋飯，黑松露牛油帶子，香蔥雞串，邪惡包，火焰鐵板牛柳粒同紫薯甘粟餅。-首先講講個火焰鐵板牛柳粒，一上嚟店員就倒咗啲應該係酒精既野落去，然後成碟野著曬火好吸引，隔離枱啲人全部望晒過嚟😂仲有個邪惡包都一樣係好吸睛，上枱係用張木櫈仔放，紫菜包住帶子同鵝肝，好邪惡🤣牛油帶子用鐵板上，上枱時啲汁仲響緊，而且大粒又好味👍🏻，個香葱雞串都唔錯，加晒啲汁整體配撘得好好。另外個蒜片牛柳粒石鍋飯我地叫嚟係想飽肚，本身以為佢會冇啲小食咁好食，但估唔到個牛柳粒又唔錯，有牛味又唔會太熟，咁汁配飯味道都好食，而且好大碗，最後我地冇食曬啲飯。最後個紫薯甘粟餅我地當係甜品總結，同一般食既紫薯甘粟餅一樣，都係好味。我覺得呢到環境幾舒適，食物同飲品選擇又多，我地個位後面仲有啲書可以拎嚟睇，嚟開銅鑼灣同朋友嚟食吓野係唔錯既選擇。