煲仔榮記 (已結業)

成日話要去慈雲山試，點知開埋分店係旺角都未去到😂所以不如直接去旺角食啦！門面其實好搶眼，因為好大個花牌係上面，遠一遠就見到。一入門口好似返左舊時咁，紅色鐵閘，棚架，大牌檔摺檯摺櫈。我地坐吧枱對住個棚架食野都幾有風味。煲仔沾麵（沙嗲醬/龍蝦湯底/滑牛/公仔麵）擺盤好盞鬼，用個竹筲箕裝住個牛肉麵，沙嗲汁就另外煲仔上。個汁好杰好多花生碎，不過食唔出龍蝦湯味。食左一半就已經覺得太heavy，好彩我地share黎食，一半沾麵一半湯麵先冇食得咁辛苦。煲仔湯麵（沙嗲醬/雞湯底/滑牛/公仔麵）個湯比沾麵冇咁杰反而我會覺得剛剛好。但價錢同沾麵一樣，感覺上偏貴。麻辣三寶（魷魚+豬皮+牛柏葉）好得意用一個小瓦煲做器皿，聞到好大陣麻辣味，食落去後勁好辣，不過唔算麻。平時食得辣嘅我都覺得偏辣。整體來講比想像中好食，但湯麵黎講偏貴。抵讚貼心位，餐廳提供紙巾同牙線棒。