Cafe Hillywood (已結業)

雖然我唔係喺理大讀書，但想當年阿妹係理大生，星期一至五朝九晚五上堂，中午食飯一個鐘，十足十返工一樣。我果時空堂多，多數都係我去搵阿妹食飯。搭地鐵去到佐敦，沿著柯士甸道行去理大，短短路程大概十分鐘左右，果時道路兩邊冇乜食店，如果去理大多數去canteen食，依家就唔同喇，附近咁多嘢食，唔使獨孤一味。Cafe Hillywood大概喺柯士甸路同柯士甸道交界，算比較偏離佐敦旺區，仲要喺地庫，唔係阿妹帶路都唔識去。平日夜晚去到，得番門口張吉枱，都真係好旺場。小店裝修簡單，最特別就係一入門口幅紅鶴壁畫。餐廳用上open kitchen設計，感覺上與客人拉近距離。阿妹話呢度啲意粉係手製要試吓，驚一個唔夠食叫咗兩個，另加小食焗大啡菇同清酒大蜆。叫杯自製梳打蘋果薑啤兩個人分嚟飲，杯梳打蘋果味重，飲落幾甜，凍飲落肉桂粉啲粉浮晒喺面，如果用肉桂條效果可能會好啲。香燒三色大波特菇，以番茄茸最夠味，酸酸甜甜比較醒胃，香草同芝士兩隻味道都淡口，幸好大啡菇本身焗起就會鮮甜多汁。招牌鮮海膽意粉海膽用上日本貨色，貴精不貴多，顏色淺黃乃新鮮貨品，入口有海水味鮮甜味濃，拌上手製意粉煙韌彈牙，非常配合，醬汁如果可以少一點更