香江花月 (百誠大廈)

坐低無耐睇中咗個「日本牛乳玫瑰鍋」呢個湯底，一上枱勁打卡📸，成個湯底係乳白色，面頭用咗牛乳玫瑰花冰，浸喺牛乳汁入面，睇見都覺得治癒。滾起之後飲咗啖湯，奶香溫柔，帶微微甜。

跟住主角登場：「海陸雙饌」海鮮拼盤有蝦、鮑魚、蜆、魚，樣樣睇得出好新鮮，特別係啲蝦，淥熟之後爽口彈牙，魚肉好厚身，肉質嫩滑。

另一邊嘅「特選黃牛呼拉圈」就玩內臟，牛脷薄切快熟軟淋、牛柏葉爽脆、牛小腿同牛心椗彈牙有嚼頭、牛白肉油脂甘香，每款淥十零秒就食得，牛味濃得嚟唔羶。我鍾意將牛脷點少少豉油，再加蔥花同炸蒜，入口牛味濃郁好香口。