Burger Joys (第一街)

营业中

休息中

成日食麥記都食到好悶，今日試吓新野，去咗西營盤呢間Burger Joys，地方都幾隱蔽，要喺橫街落樓梯，搵咗一陣先見到。驟眼睇價錢好似偏高，但係其實個餐分量十足，絕對值回票價。首先要講吓飲品，因為真係太驚喜。本身唔係特別鍾意飲汽水，諗住如果係樽裝水會好唔抵，點知佢哋俾咗支斐濟水我哋。然後嚟咗沙律，雖然係跟餐嘅，但係都唔馬虎，有番茄有青瓜，酸酸地嘅醬汁，非常開胃。朋友叫咗芝士牛肉漢堡，一睇就知同平時麥記好唔同。除咗牛肉明顯地厚身之外，包亦都比較鬆軟，唔會好乾，當然牛肉味亦都非常濃厚啦。薯條方面，簡直可以用出色嚟形容。雖然外型同麥記相似，但係比較硬身，食落去比較脆比較香口，同時亦都鹹度適中，原本揀咗沙律嘅朋友都食到停唔到口。我自己就叫咗個雜菌蘑菇漢堡，本來想像係烤大啡菇，但其實佢哋係用炸嘅，但係感覺都好新鮮，炸菇好juicy，亦都唔覺得油膩。最後叫咗個水牛雞翼，酸酸辣辣咁，雖然好食但係有少少重口味，好彩有西芹同甘筍做配菜平衡返。