曜 (已結業)

上網睇到呢間餐廳都幾特別，可以私人訂制割烹料理menu。為慶祝四月終於結束🥲🥲，🐗同我放假黎食午餐廚師發辦。食物水準合乎預期，即使係午市，選用嘅食材都幾高質，有A5和牛、海膽同日本毛蟹等。幾款刺身係肉質較爽彈而不油，好配合之後味道濃郁嘅菜式。每款都好新鮮，我地最鍾意係海膽配魷魚條刺身，金目鯛同水母刺身。部份配以酸汁更開胃。之後上嘅自家製蝦丸新鮮美味，生師傅特別提到冇加粉同多餘調味，口感彈牙且純天然。大閘蟹粉毛蟹膏栗子茶碗蒸聽個名已經好想食😋😋蛋好滑，加入蟹膏增加鮮甜味道，栗子粒增加口感。由於壽司師傅放假，餐廳以慢煮鮑魚炒飯代替壽司5點，炒飯係用和牛牛油炒香加入日本蟹湯製成湯飯，慢煮鮑魚嫩滑，帶有少少肝醬味道，加左海膽令成道菜更矜貴同美味。雖然試唔到壽司師傅嘅手藝，但呢道菜都好好味😋我地都非常鍾意烤A5和牛三角，選用油脂最豐富嘅BMS 12姬路和牛，口感嫩滑，帶油香濃郁，以四種水果醃過增加了果香同清甜，中和左油膩感。餐湯跟左魚湯，有別於平時跟嘅味噌湯。用左蜜柑鯛和真鯛熬製，奶白色嘅魚湯冇腥味同薑味，純粹得魚鮮味同有淡淡柑橘香。最後以季節性水果日本赤肉蜜瓜作結，每啖爆汁和散發獨有麝香甜味。