六合小巷 (已結業)

六合小巷係一間主打台灣美食嘅鋪頭，入內即見到顏色繽紛嘅燈籠，令人有驁喜，有夜市的感覺。地方唔算大，簡簡單單的設計，加上幾張木枱，尚算舒適。同朋友叫咗個黑麻油蟲草花濃雞湯幼麵，新鮮雞件浸喺奶白色嘅湯入面，好入味，雞肉鮮甜幼滑，加埋蟲草花及黑麻油，極之暖胃，幼麵亦吸收咗各種味道，顯得格外入味及滑溜，食到雪雪聲。食台灣嘢當然唔少得鹽酥雞，一次過叫咗個大拼盤，有埋花枝丸及杏鮑菇，更加滿足。鹽酥雞香脆，花之丸爽口彈牙，杏鮑菇更出奇地脆身，零舍有風味。台式燒香腸令人諗起台灣夜市風味，香腸甘香入味，好好食。 Oreo麻糬幾別出心裁，造型似一個盆栽，Oreo碎似泥 土，舀出嘅麻糬非常煙靭，食落有奶香，幾特別嘅口感。另外叫咗香芋奶茶加仙草，熱飲裏面的確有細細粒芋頭，充滿芋香，加上仙草，令口感更豐富。另一杯桂花涷雙奶，係煉奶加鮮奶稱為雙奶，煉奶香味豐盈，奶味香甜，配鮮奶中和，別有特色，桂花凍則軟身滑溜，充滿桂花味，清新可口。台灣的感覺返晒嚟，再三回味就要等下一次。