法式牛扒屋 (已結業)

晚餐A/B Set 各有幾個main course 揀，原來已經囊括成份menu 咁滯，想食牛柳但係睇匀都冇，揀黎都o徙氣，見到隔離檯既海鮮盤得幾款蠔同幾隻翡翠螺，感覺上唔多抵食，叫左個冇海鮮盤既A 餐，每人兩件麵包，外脆內軟，侍應見我食晒兩件麵包，好識做咁主動問我要唔要加Ｄ麵包，其實麵包值得幾多錢丫？但係感覺上服務就好細心；記得上次去銅鑼灣OutBack 食晚飯，點左沙律，頭盤同主菜，問個侍應有冇麵包，侍應答：冇架！跟餐湯先有麵包個喎，你想食咩？送客俾你囉！唉...真係食左都o係背脊骨落！跟住上餐湯，龍蝦濃湯，味道幾好，可惜唔多夠杰，個質感爭左少少，頭盤煎鵝肝，薄薄地都好夠油香，但嫌略為多筋，餐廳注意下應該可以改善，跟住上主菜炭燒肉眼扒終於出事勒！塊肉眼扒有手掌咁大，好薄身，味道一Ｄ都冇，淨係有炭味而冇炭燒香味，又勁韌，好在檯面有樽芥末，可以加返多少味道，不過一樣o趙到牙都軟（我覺得塊扒類似吉之島$59.9 三塊既貨色）。同主菜博鬥完上甜品，一球普通云呢那雪糕，食唔出有乜特別，似牛奶公司貨仔，伴一件迷仔朱古力心太軟，呢件野幾有睇頭喎！細細件得黎有濃厚朱古力香味，外層又夠薄，溫度又適中