爺爺雞煲皇 (美景街) (已結業)

平時好少去土瓜灣，但有個朋友啱啱搬入附近，成班朋友諗唔到食咩所以揀食附近既雞煲就過咗嚟。入到去發覺座位闊落，地方都好乾淨，侍應好好態度。😍我哋四個人叫咗一個招牌爺爺雞煲，小辣嘅，嚟到見到啲雞既份量好多，味道都唔錯，雞肉好多肉汁好嫩，唔會話煮到過老，我哋食完啲雞已經開始覺得有少少飽。🤣我哋叫咗自家制響鈴，即炸魚皮，手打魚肉，特選黑豚肉同手切肥牛，仲有一份雜菜。魚皮新鮮炸起既，同出面賣嗰啲唔同，特別香脆可口。呢到既黑豚肉係薄切，肉質好嫩而手切肥牛則係我既至愛，肉味好濃，落鍋幾秒即食，肥瘦適中，食到停唔到口！蔬菜嘅份量都好多，一籃有唔同種類嘅菜，連我比較鍾意食嘅油麥菜都有。手打四寶丸特別推介佢個蝦丸同墨魚丸，咬落口真係有蝦肉同墨魚粒，好彈牙好有咬口！整體黎講都係水準之上，一定會再嚟食。