辣度餐廳 (已結業)

烚烚吓就係香港人本色，百花齊放的火鍋中有幾多間真係可以屹立不倒？我希望呢間辣度餐廳真係可以做到。餐廳好近外母家，地方唔多過十張檯，不過乾乾淨淨坐得好舒服。混醬款式唔多蔥花，蒜蓉自己攪掂。湯底要咗豬骨鍋，有粟米蘿蔔同兩大什豬筒骨抵食。整個即炸嚮鈴食吓先，熱辣辣又點會唔好食呀！最鍾意食牛肉梗係整碟最正嘅極品肥牛，肥瘦適中有牛香又夠淋掂呀。老婆大人特赦我食邪惡豬腦花太幸福了，用花雕酒浸過嘅豬腦食落滑到不得了，仲有酒味香濃好鬼C正架。 外母大人鍾意食雞梗係要叫啦！估唔到真係雞有雞味喎，仲好有肉地添。廣島蠔好圓潤，灼熟後冇縮小，食落有口感，蠔味可以再重啲！脆鯇魚片真的靚到不之得了，令立立嘅魚身食落脆口又有魚香太好味喇。鮮蝦雲吞皮薄餡足唔錯啊！老婆大人介紹我哋食冰豆腐，原來冰過嘅豆腐會變成蜂巢狀，放入湯後好似海綿咁吸晒D精華食落去享受無比。蔬菜籃內的娃娃菜，生菜都常見，通菜喺火鍋店較少見，全部都好鮮嫩。呢間餐廳真係好有心做，我好希望佢生意興隆，繼續諗多D新美食就好了。