潮營火鍋小炒菜館 (已結業)

上水馬會道一向係上水餐廳最集中地，見到新開既小炒菜館，就決定入去試下，我地接近8點入座，都座無虛席，一座底就有靚湯飲，招呼周到。唔怪得咁多街坊支持。餐牌食物比想像中多，又有烤魚、酸菜魚、雞煲、小菜、碟頭飯，價值抵食，仲唔洗加一添，性價比好高！醉雞煲藥材都唔少，酒味香濃，加埋雞件煲滾後，先飲啖湯，濃濃花雕酒香味，雞件滑嫩，點埋豉油食夠滋味。白蘿蔔，吸收哂湯底味道，熱量少，又幫助消化，食多野再食返蘿蔔就無有怕。沙芥一口牛，份量比想像中多好多，仲鋪滿西蘭花係底層，一口牛肉口感非常軟腍惹味，就甘食已經好正，點埋個芥末醬平衡口感仲正，非常滋味！牛油黃金蝦，用既係基圍蝦，雖然唔太大隻，但勝在鮮味十足，加上鹹蛋牛油味濃，令鮮蝦更惹味。蒜蓉魷魚高山菜，呢道菜係以既蒸方式，看似做法簡單，但卻十分美味，蒜蓉非常香口，配鮮魷加娃娃菜墊底一齊蒸，索曬d汁更加原汁原味。呢度老闆娘都好NICE，而且餐廳食物出品高，要搵日再黎食下其他小菜先得。