經濟任食，都懶得再買海鮮入黎。居然撞到幾個老友，大家果然係大埔友。任食套餐，執定基本唔夠再添。腸仔、雞中翼、魷魚翼、魚蛋、墨魚丸、牛丸、芝士腸、芝心丸、多春魚、豬扒、牛扒、牛柳粒、金砂骨、雞扒、等等。
叔叔游刃有餘地起好火，餓死朕喇，立即開動！每次我都會使出三叉流奧義，不想浪費時間及炭火。火很美多變，忍不住每次燒烤都不停拍照﹗自家製泰式酸辣汁，中辣強酸開胃無限，似生蝦泰式汁，配雞翼、豬扒最合適。
紅腸、牛丸、墨魚丸、芝士腸、魚蛋。雞中翼、雞全翼、雞腎、魷魚翼、豬扒、牛扒、紅腸、金沙骨、多春魚，全部高質無投訴，醃味醇美恰到好處。唯一出事係鱔柳，醃味及肉味都怪怪地。
麻辣雞中翼，近年新出品，朋友們大讚，我第一次試。既香又辣，醃得入味，外層燒到金黃香脆，裡面就嫩滑多汁，好好味 ﹗蒜香豬扒，重手厚身好大塊！燒到兩面金黃焦香，入口鬆化有咬勁，滴汁蒜香，有骨豬甜味特別濃郁。黑椒牛扒，辛辣香氣突出，微鬆滑嘟嘟，醃味濃合格。
金砂骨，每款用叉燒醬醃製的都無得輸！肥瘦適中，肉多骨少，肉汁滴滴，損得乾乾淨淨，味道甜美堅高質。沙嗲雞腎，非常入味，微辣醒胃，爽脆多汁不乾硬。
多春魚，新鮮度滿意，慢火燒到乾身香脆，春子遇熱發脹，爆了！射到對面朋友們真不好意思。炭燒魚春極度甘香，魚肉嚥韌舔舔脷。咖喱魷魚翼，辛辣濕潤，彈滑嫩嫩。
沙嗲鱔柳，都知道白鱔係高價食材，兩百多元只得一磅呢！價錢唔係問題，最緊要好食。略厭太肥太大碌，中形較為美味！沙嗲甜甜微辣帶蒜辛，肉質激彈半爽，兇猛的油脂有點膩，而且可能大條的關係，所以泥味重一點，醃料未能完全僻去。
香草羊架，勁厚勁大件，燒起上黎更能保存肉汁。完全無晒雪剛剛冰櫃取出，要等幾耐先可以燒呢？沒有微波爐解凍嗎？厚厚羊架要耐心慢燒，迫出多餘的油脂。厚厚啖啖肉搭粗粗脂肪，咬兩啖已膩膩滯滯，質地結實有嚼勁，羶味頗強，免強頂得住。
廚師腸，連早餐都未食，塞兩條腸先！食落雖然不是正版廚師腸，幸好彈滑不硬，味道清香不過咸。緊隨再黎雞中翼、金沙骨、鱔柳、牛扒、魷魚翼，全部都滿意好味道！
蒜香雞中翼，燒得晶瑩透亮，鳳脂立立令，肥美脹卜卜，淨係賣相已經殺晒！聞一聞蒜香撲鼻，索一索炭香提味，咬一啖肉汁激射，內外彈滑多汁，蒜甘肉甜。蒜香雞全翼，近乎完美演繹！醃味得宜清爽，燒得皮脆肉嫩，雞膇彈彈，雞翼滑滑，肉汁豐富香甜。燒雞翼我鍾意食，我最愛 BBQ 呀！
駐狗仔都係食家真識食，聰明到淨係食肉唔食骨呢！損乾淨所有肉，吐出骨頭，利害！羊架只食掉兩塊，剩餘既送比隔離青年們試試吧，不想浪費。食飽飽滿載而歸，肚滿腸肥搭的歸家休息！
1
