強記飯店 (已結業)

睇左之前兩個食評，冒險去試一下；去到門口，一般港式茶餐廳格局，之前兩位食評家講既都無錯，的而且確"環境不太清潔"，不過我地香港人都見慣啦，香港十間茶餐廳，有八間都係咁款架啦，佢唔響你食緊飯果時隊支掃巴過黎叫你縮腳咪算好0羅；講番食物，我地兩個人點左兩個燉湯餐(因為想飲湯)，兩個燉湯，燉湯都有成12款可選，兩碟燒味雙拼，都係離唔開雞、鴨、鵝、叉燒、燒肉啦......，兩碟油菜(放埋左一碟)，兩個白飯，Total $110埋單，其實今時今日既經濟環境，$50至$55有兩送一飯一湯，絕對唔算貴喇；可能打定輸數關係，反而有小小驚喜，燒味一般啦，但燉湯都算OK；其實店內唔止得燒味食，仲有其他飯類及炒粉麵食，一般茶餐廳款式啦；不過勸大家賽馬日都係唔好去喇，因為附近有投注站，所以賽馬日會比較多馬迷響度研究馬匹，比較嘈雜。