金裝燉奶佬餐廳 (已結業)

呢間野啱啱係第一城開既時候晚晚都爆晒. 淨係等位都要等成個幾兩個鐘先食到一餐飯. 因為羊群心理既關係, 係嗰段時段我都 "等" 過一次. 結果係自從嗰次就無食過~~~ 係餐廳門口既人潮一日少過一日, 到而家高峰時期都好少出現人潮. 背後既原因我諗 '味道' 都佔一定既份量!朋友係我屋食完煮家飯之後提議去食糖水, 全個第一城好似得番呢到同許留山... 因為唔想食浸左糖水既芒果, 所以最後我揀左呢到. 雖然唔駛等位, 不過餐廳既入座率都幾高. 睇完餐牌之後就點左薑汁燉奶! 燉奶佬既燉奶, 應該都算係安全之選! 上枱時溫度適中, 暖暖地可以即刻放入口嗰隻... 燉奶本身都好滑, 薑味既濃淡都適中, 但係~~~ 太甜~~~ 本來熱 + 薑味都已經中和左某程度上既甜度, 但係食落依然係過甜. 我同朋友都係食左一半就放棄左! 時隔多年再黎都唔得, 我諗我唔會再比第三次機會佢喇!