割烹 櫓杏 (iSQUARE國際廣場)

营业中

休息中

又有一段時間冇同媽咪撐枱腳食餐好，呢日中午就去咗iSquare 28樓嘅割烹 櫓杏食午餐。iSquare高層嘅餐廳都有『絕景』，割烹-櫓杏都唔例外，餐廳有開揚嘅維港景色，而且欣賞餐廳私隱度極高，分成一個個小包廂，好適合傾計！割烹 櫓杏嘅食材，包括：肉類、鮮魚、蔬菜、水果及酒類，都係來自熊本縣。門口位置仲有一個迷你百貨，售賣熊本縣嘅果汁、醬料、蔬菜等等呢！有興趣嘅朋友可以睇下！我點咗熊本天草直送鮮魚刺身御膳($298)，五款刺身都係天草直送，非常新鮮。帶子口感柔軟，味道鮮甜；油甘魚魚味香濃，口感細緻；吞拿魚雖然唔係拖羅部位，但入口無筋，魚味較重；牡丹蝦爽滑鮮甜；立魚魚肉細膩甘甜。茶碗蒸亦水準不錯，除咗做到基本嘅蛋要夠滑之外，茶碗蒸亦用上鮮甜嘅高湯去蒸，所以味道非常鮮！至於沙律菜原來非平庸之物！所用嘅蔬菜唔淨只係來自熊本咁簡單，原來係聽著莫札特音樂成長嘅蔬菜！非常搞笑！除咗漬物之外，仲有飯後水果。哈蜜瓜香甜怡人，確實係一餐飯最好嘅作結。