我哋今次揀咗120分鐘Prime Grade牛肩胛＋西班牙無激素豬肉套餐（$273/位），要係可以加$40轉做無限時，真係好適合我哋一班朋友慢慢傾計慢慢食～
雖然係最平個set，但啲牛肉出奇地高質，完全唔輸俾出面啲貴價放題！Prime安格斯牛肩胛肉雪花紋超靚，淥十秒就啱啱好，肉味超香超嫩滑，真心推介肉控一定要試！
西班牙無激素豬肉片都好掂，薄切唔油膩，食落好juicy。
湯底我哋揀咗田園蕃茄濃湯牛肉涮涮鍋，湯底超足料，仲有牛肋骨條，飲落好香好暖胃，打邊爐一流！
海鮮方面都好有驚喜，鯇魚片同白鱔片超爽脆鮮甜，海蝦仲係游水上枱，生猛到不得了，啲蝦彈牙到好誇張！
蔬菜都唔馬虎，有平時少見嘅鮮淮山同羽衣甘藍，吸晒湯底精華，食落好爽口又健康。仲有自家製台灣手工拉麵、王子麵，麵控都滿足到！
飲品櫃有齊台式奶茶、汽水，甜品仲有Movenpick同Dreyer’s雪糕，仲有Häagen-Dazs，打邊爐完再食杯雪糕，完美ending！
整體嚟講，「鍋霸」真心高CP，食材新鮮夠多選擇，份量又足，旺角搵食真係多咗個好選擇，之後一定會再encore！
#旺角打邊爐 #打卡火鍋 #鍋霸 #台式火鍋放題 #安格斯牛 #平靚正 #吃貨推介 #旺角美食 #香港放題
