南越餐廳 (已結業)

Item: 南越餐廳
Rating: 2
Author: 奧志雷

Nan Viet Restaurant

27 食记

味道

环境

服务

卫生

抵食

202

红磡

$50以下

越南菜

奧志雷

等级4

2.1K

職員態度傲慢輕佻，無限輪迴地出錯，抱著不忍輸、不忍錯的信念，紅磡區手屈一指米芝連負 3 星服務 ﹗

琴晚追動漫追到四點幾先瞓，lunch訓返半個鐘叉叉電即刻落街食野。燒味、車仔麵、煎釀三寶、海南雞？猶豫了半響，浪費左幾分鐘添，是鬼但對面馬路越南河啦﹗

橘子餐廳特然結業，換來南越出場，就來一探究竟。聽聞乃是紅磡第 2 分店，總店就在附近北拱街呢。略略查看一下菜牌，跟一般越南河菜館大同小異，沒什麼大分別，亦發現不到什麼另類自創菜色。到會都做埋？少有聽聞喎。

檔案編號 061017：老闆落單時我已經重複兩次要全走。最後由金髮大隻阿嬸送上，我望一望臉色一沉，忍不住嚷道：我要全走架喎？金髮大隻阿嬸駁咀回句：全走就咩都走晒喇喎﹗

檔案編號 111017：阿嬸話加 $3 蚊轉金邊粉，當然無問題啦 ﹗誰知無落單改金邊粉囉，幸好都有走芽菜走蔥。另一肥嬸送上檬粉，我即回應話要金邊粉架，但肥嬸一於懶理轉身跑掉，完全無幫我換既意欲，唔出聲，迫我就飯，同上次金髮大隻阿嬸態度一模一樣﹗

檔案編號 141117：您地係勁既，全部同鄉黎架？上次老闆寫單都錯，今次阿嬸懶勁用腦記單，還匆匆忙忙催促我地落單，咪又係錯！肥嬸見有兩個單丁位，幽默感大發，風趣非常！問我地兩個分唔分檯坐？那倒不如分開食啦！肥嬸依然死心不息，再問後面兩位，同樣被拒絕！再問後後面兩位，再再被拒絕！終於扁住嘴放棄啦。全部神州阿姐阿嬏阿姑，個個天生異品，有料﹗全港飲食界已被大陸包左黎做嗎？

檔案編號 011217：短金髮肥嬸您唔係兇我呀？唔知以為您地成班跑私佣爭住落單！我生得善良就想洽膠我嗎！雷：香茅雞扒湯金邊粉，有無芽菜架？金髮肥：有呀。雷：走芽菜唔該，熱檸水。金髮肥行左去入機落單，金髮瘦行過黎。金髮瘦：先生落左單未？雷：落左喇。金髮瘦：食啲咩呢？雷：香茅雞扒湯金邊粉走芽菜，走芽菜喎。金髮瘦又走去入機，我心諗去 check 單乍麻，誰知金髮瘦先放張單比我，之後金髮肥攞住佢張單返到黎。金髮肥面黑黑語氣差道：您唔係叫我落單架咩，仲咩又落單呀！雷：我講左我落左單啦，佢聽唔到掛。同檯幾個阿叔阿嬸即時都投以奇怪目光望過黎。

檔案編號 051217：香茅雞扒湯金邊粉，原來唔止有芽菜，係什麼都有 ﹗即係我要叫全走先得咯。我都話走芽菜咯，依家全部生菜香菜連芽菜要親手夾走。

檔案編號 171218：雷：鮮茄雞絲金邊粉全走。大隻綣毛嬸：全走？雷：走芽菜、九層塔呢。大隻綣毛嬸：鮮茄唔會有啦。雷：如果無就最好喇。大隻綣毛嬸拿住碗粉過黎：唔好意思，真係有芽菜喎。雷無言幾秒：哦，咁、您。大隻綣毛嬸企定定唔出聲，雷心諗您即係等我話要啫：算啦算啦，我照食，您比個碗我自己挑啦﹗上次叫咖哩都有芽菜同九層塔囉。

檔案編號 241218：兜左兩個圈，千揀萬揀又中招！大隻綣毛短髮阿嬸又係您呀，係咪好憎我啫！上次食茄湯雞絲就跣我話唔會落牙菜，搞到揀餐死浪費我時間，依鑊連一樣我想食既都唔比我！我要炸蝦餅湯金邊粉全走，比碗春卷湯檬粉，搞夠錯呀！我最憎食瀨粉、檬粉，亦都唔鍾意食越南春卷！張單可以錯到春卷撈檬粉改湯檬粉全走，淨係全走中左，頂您玩夠我咩！而且我坐低先及我落單先架，仲咩隔離美女遲過我黎入黎，佢張單入先呀！美女食緊我仲要係度等食，搞能錯，死福佳！

熱檸水，我唔飲野喇，嬸嬸話熱飲送架喎，比杯熱檸水您好無？咁好啦，唔該。生牛肉湯河，同事點的湯河完全體，聞到香菜陣味道就有點反胃，我真的受不了。生牛肉河全走，先試河粉下次到金邊粉。驚喜萬分的生牛肉片，不乾不鞋，鬆軟綿密細緻優雅，清淡天然牛肉原始味道，宜人舒適恰到好處。厚厚牛骨湯底，甜美無比，回味無窮。

隨後添加指天椒及鮮青檸汁，更是如虎添翼，酸辣牛骨湯飲到不能停下來。來幾口原味湯河，再來酸辣，最後到史拉差辣椒醬。貪心的要試足三種味道，蒜辣湯辛辣帶點酸，飲慾暴走，大啖大啖地啜，跟河粉一齊舞動轉到齒舌之間，湯汁浸著廷身滑滑河粉，色香味蠻不錯啊！

沙嗲豬肉串，沒有跟上沙嗲醬？原來是用沙嗲汁醃的，醃味濃而帶點怪怪的酸味，肉粒嚥韌略乾硬，不喜歡，試一次便夠。南越火箭蝦，記得九龍城厚福館火鍋稱吊桶為反坦克火箭筒，我還幻想什麼是火箭蝦，會否是竹簽串著海蝦呢？竟然係越南網紙炸蝦春卷，真係離天百丈遠。炸得透徹脆卜卜，原隻海蝦卷在其中，厚厚的春卷皮還免強食得到蝦甜味，浸在魚露醋半響，酸酸甜甜可以去一去油膩感及煎炸感，平凡唔難食。

香茅豬肉米紙卷，沒有芫茜、沒有芹菜、沒有九層塔、沒有青蔥真係好啊 ﹗全部我都食唔到，一入口就會反胃呢。捲著大量生菜絲、青瓜絲、檬粉，再夾著少少香茅豬肉，沒有花生醬供應，用上魚露醋，直接整件塞入嘴仔。我一向都不喜歡米紙卷的，幸好這碌入得口唔難食。

迷你南越火車頭金邊粉，我要全走架喎？依家要我自己花時間慢慢挑走，湯底已被芽菜及蔥花沾污，極濃草青味，腥腥地﹗芽菜會放出水份，搞到湯底都淡鬼晒水汪汪，可惡﹗想加多份青檸指天椒，希望用強酸強辣蓋過腥嗅青味，竟然要額外收 $1 蚊，您滷味﹗我食左幾十年越南河，都未試過要加錢，要數錢唔加啦﹗

迷你南越火車頭金邊粉，同事只用掉半份指天椒，我當然用埋唔好浪費。但味道始終敵不過芽菜生蔥嗅腥青味，唯有出最後絕招，大量史拉差辣椒醬，最衰湯底唔夠熱，不太溶得到大量辣椒醬啊。湯唔夠熱那會好食，是鬼但求其食完算那數，火都黎﹗一大舊麵餅黐埋沉底，花點時間慢慢撩散，金邊粉過腍而且有點碎。湯汁水汪汪淡茂茂，金邊粉腍劈劈，無全走﹗無走蔥、無走芽菜、無走洋蔥、無走九層塔﹗生牛肉片？熟到十幾成喇喎。牛腩片、牛丸、牛筋硬掘掘，給多點牙力趙吧，就連牛柏葉都韌硬鞋。

蝦頭膏酸辣海鮮湯檬粉走蔥走芽菜，我都話要金邊粉咯 ﹗由細到大都好憎食瀨粉或檬粉，檬粉十幾年前食過一次已非常討厭﹗酸辣湯底十足冬蔭功湯，只係無茄膏、無椰奶、無香茅。夠酸夠辣夠開胃，香濃味美好好飲，但蝦頭膏在那？海蝦食得出鮮味，蝦肉爽彈多汁，蝦甜味出眾非凡，真心好好食。青口都帶著鮮味，嚥韌帶彈好難得呢。有幾粒貝柱仔吊味，蟹柳廉價大陸貨，鬆散假到震﹗最厭惡食檬粉，格硬吞落肚，非常厭惡﹗

牛油雞中翼，咬開即時傳來似曾相識的味道，跟牛油曲奇餅味道似十足，好搞笑啊 ﹗炸得非常乾爽，不是炸完再撈牛油那麼馬虎求其，牛油已完完全全滲透炸粉之中，外表看起來不會發現半點牛油的踪影，聞得出牛油香，食得出牛油甜﹗薄薄炸粉已跟雞皮融合為一體，先脆後嚥韌，繼而爆開，肉汁射出，白滑雞肉，真的烹調得出乎意料的出色。

迷你南越火車頭金邊粉全走，望望個菜牌寫住有生牛片、牛腩片、牛柏葉、牛筋、牛丸，共 5 款，但眼見只有牛丸 1 粒、牛柏葉 2 件、牛展 2 片，生牛片呢？牛腩片呢？私自用 2 片牛展代替嗎？有無問過我呀，搵笨喎，可惡﹗水汪汪的賣相，其實放那麼多湯想點呢？真係好肉酸架﹗

火車頭只得 4 款餸？牛丸、牛柏葉、牛展、牛筋，無緊要，照食。湯汁夠熱，不到燙嘴會灼傷既溫度，可以盡情大口地飲呢。微香微甜無羶味，有牛香牛甜味，還可以。牛展？真奇怪唔係用牛肉片既？算數，食左先講。硬硬韌韌，加多兩錢力趙碎吞下，頂得住無意見，慳返啖氣。牛丸好大粒喎，不過極淡口，牛味薄弱無肉汁。牛柏葉烚到過晒龍，勁老喎﹗

以上都未算極品，最利害永遠壓軸登場﹗牛筋好平嗎？比 4 大舊那麼多，堅巨形大大舊。超韌牛筋趙到索索聲，食到又要拉又要扯方可硬哽落肚，最後 1 舊真係趙唔掂，咬極都唔斷，放入口都要吐返出黎﹗最好食都係金邊粉，烚得出乎意料地高質。綿綿嚥韌，不腍劈劈、不散筲筲，可口無比，試完大半碗原味，加點士拉差辣椒醬試試。依隻辣椒醬牌子完全唔掂，有股啫喱及果味，不夠酸又不夠辣，偏甜的怪味士拉差。青檸梳打加 $5 蚊，埋單 $75，除左個美味金邊粉份量夠多外，其他完全唔值。

咖哩牛腩湯金邊粉，我心諗咖哩湯應詃無加芽菜掛？點知真係連咖哩都唔放過，芽菜照落可也，仲要有保護色添，挑死我喇。突想起某年某月某個故事，成班朋友叫小菜食飯，其中一個唔食牛，要扣返碟牛錢先除人數，另一個有樣學樣唔食蠔又要扣返出黎，再繼續無飲酒既又扣返條數先除開！您地玩咩，倒不如唔好一齊食飯啦，自己食個碟頭飯、自己食快餐店，食個餐加杯餐飲咪算那數唔怕蝕底囉！

牛腩居然可以炆到乾鞋硬，還散發羶味。微硬用點力都免強趙得到，係有點攰啫，質感似牛腱，原味沒什麼醃味。咖哩湯不錯，未算太稀，有喇沙影子，黏厚帶點椰香。芽菜染成咖哩色，非常有保護，挑都我傻，花點時間終於清理乾淨，可以安心大啖大啖地塞入口喇﹗金邊粉嚥韌又不失綿滑，米香突出可口，掛著咖哩汁又真的幾好味喎。

香茅雞扒湯金邊粉，加添鮮青檸汁及全部指天椒，湯汁異常濃郁甜美滾熱辣，酸酸辣辣非常可口，真的超乎想像的美味。金邊粉嚥韌滑溜超水準，大啖大啖連湯吸啜一氣呵成十分美味，最後湯汁都被我飲剩少少乍。雞扒炸到乾硬刮口，沒半點肉汁。雞皮脆脆，浸湯較易嘴嚼，香茅味道薄弱，反而甜味濃郁。我寧願原塊雞扒上檯我自己鋸，依家乾爭爭鞋烚烚。

越式炸蝦餅金邊粉全走，越式炸蝦餅乃是煎不是炸呢。用蛋漿包著香煎，微暖不滾，油到滴出來。質地似足炸魚片，外皮香口嚥韌，白肉柔軟，連味道都似魚片呢。軟乃乃不廷身，彈力不足，腍劈劈訓著覺咩。燒豬頸肉，上半暖而下半凍，冰火黎喎，創意爆燈 ﹗有燒烤味但無焦香味，爽彈滿意，微波感重。

椒鹽豬扒，啖啖肉食不到香茅味，甜味強烈尚算香口。海鮮喇沙湯檬粉，配菜多多，豆卜、海蝦、迷你帶子、青口、蟹柳、熟蛋、檬粉。大蝦喇沙湯金邊粉全走，加入海蝦、熟蛋、豆卜、等等。恭喜嬸嬸有改善無落錯單，恭喜廚房有改善即煮金邊粉無黐埋一團成舊沉底。挖出蛋黃跟湯汁及金邊粉混合，滑爽彈嚥韌熱騰騰的金邊粉，大大注夾著大量喇沙湯塞入口掛上蛋黃碎，塞得嘴仔脹卜卜方肯罷休，熱到差點吞不下呢，食得十分開心愉快啊﹗喇沙湯黏稠厚厚，恰像濃濃咖哩汁，甜美香辣惹味，回味無窮，豆卜索盡湯汁嚥韌水潤好食。

香茅豬扒，鬆化有肉汁，炸得甘黃香口不油膩，泛著微微香茅清香。香茅雞中翼，皮香肉嫩，雞皮脆脆的，白肉嫩嫩 juicy。鮮茄雞絲湯金邊粉，大隻綣毛短髮阿嬸我都話全走架啦，就算本身無芽菜，同師傅講多句都唔難啫。有著保護色的芽菜真係揀死我，好采只得十幾廿十條乍。不幸地都有漏網之魚，趙到兩三條芽菜，打晒冷震。希望史拉差辣椒醬幫到手，唧入大量捲起即試，甜味嗆蒜味辣味都弱，不過已掩過大部份異味，我可以盡情地衝刺喇。

豪氣地索幾啖濃湯，茄膏底厚厚濃烈，幸好還有一絲鮮茄清爽酸甜味道。成團金邊粉沉底，溫柔地將每條粉散開跟湯汁混和，再掛著熱湯大注啜入嘴仔。滾熱辣燙燙的，灼得我十分興奮莫明，味道更提升，食得更滋味。嚥韌完整的金邊粉，綿綿地嘴嚼，滲著番茄黏稠濃湯，可口醒胃。最衰散發微弱的異味，是布味？是膠味？是紙味？用來蓋著金邊粉？用來載著金邊粉？夾雜乾鞋雞絲同吃，雖然質地平平，不過雞味真的濃郁，可以幫金邊粉助一助味，還添多一種質感。

越式炸春卷湯檬粉全走，錯到離天百丈遠，但趕時間都要照食！春卷炸到黑媽媽微微焦黑，不是白色網皮的嗎？點解用普通春卷皮？熱騰騰牛骨湯味道濃郁可口，大大啖連湯帶檬粉美味無比，加上鮮青檸汁及指天椒更醒胃，食慾激增﹗其實真心好好味架，但我最憎食檬粉呢，最後食兩啖都要掉低放棄﹗微脆帶韌焦黑的春卷皮包著檬粉菜絲，我不喜歡食炸越南春卷旳﹗求其吞幾啖湯檬，再每件春卷咬一啖，頂住肚即閃返公司﹗絕食無聲抗議，依編食評又要優先處理！