石澳中泰酒家 (已結業)

同班朋友去石澳游水，陽光普照又清風習習，原以為會多人到暈，點知又唔係，一點多來到兩架車都立刻有車位泊，可能尋晚的一場雨嚇怕了不少人。游左一陣水就肚餓，就同她兩個溜了出來去搵野食。現在石澳在食的方面選擇也可不少，除了一貫的中菜、泰菜、車仔麵、餐蛋麵同九唔搭八又貴的西餐外，亦有幾間裝修得幾靚的。但我們最後也選了呢度，事關成十年前同佢搭巴士來吃過一次，食開有感情也。無冷氣，得幾把牛角扇又大風扇在吹吹下，一貫沙灘食肆的味道，但夾埋陣陣清涼的海風，同我倆一身都是游水裝束，其實都唔太熱。叫左菠蘿炒飯，春卷同炒通菜，兩支啤酒，是當年一模一樣的菜色。食物份量足夠，兩個人叫三個菜是多了一點。味道也沒有多大退步，當然不能說是很出色。其中春卷香口又舊舊有蝦，是飲啤酒傾計的最佳佐料。不過飲左啤酒後都有些少味精的感覺，我諗下得比較重手。菜色依舊，人面全非，連招呼的一眾南亞裔藉員工都換上了第二代。「都十年有多了！」就是食完我們相視而笑的一句。