Sodam Chicken (已結業)

韓國文化對香港人的影響都幾深，特別係韓國的劇集真係令人津津樂道，經常睇到男女主角都會食韓國炸雞配啤酒，到底有幾好食我都要試下先。同追開韓劇的朋友經過銅鑼灣搵食，咁緊係要食韓國炸雞啦，網上搵到Sodam Chicken韓國無骨炸雞+Pizza放題，每位129蚊，任食時間90分鐘，加多20蚊仲可以有埋焗雞同小食，主菜有半價優惠，飲品仲有買一送一，不過我地2個都唔係大食所以無加主菜。食物方面可以在單點選，我地先選甜酸炸雞、黃金鹹蛋炸雞、BBQ香辣焗雞同雙重芝士焗雞。最好食係黃金鹹蛋炸雞，好香濃的鹹蛋味，十分邪惡但係超級滿足，另外BBQ香辣焗雞都好正，焗雞無炸雞咁熱氣，辣辣地好過癮。另外都點咗Pizza，一份有齊4款味道，包括千島加勒比薄餅、熱帶風情薄餅、明蝦水牛芝士薄餅和香草雜菌薄餅，每件薄餅都係細細塊，一次過滿足多心的我。小食方面最鍾意韓式辣拌海蜇，醬汁微辣配上海蜇，越食越滋味。清下口腔油膩感當然要食埋柚子醋沙律，新鮮沙律菜配清新柚子醋，So Fresh！最後埋單都係3百幾蚊，同朋友嘻嘻哈哈又一個晚上，好滿意的一餐！