Sodam Chicken (已結業)

八號波前夕去左銅鑼灣Sodam Chicken食咗個炸雞放題🤤其實無論堂食定外賣都食過好幾次，今次係見到佢哋推出新口味就再去食！餐廳裝修偏工業風，有一半坐位係沙發卡位，亦都有長枱，無論兩個人撐枱腳定成班朋友聚會都得！落單非常方便，自己坐喺位scan QR code就可以睇到餐牌同落單！炸雞Pizza放題90分鐘（$178）可以任食炸雞、焗雞、pizza同小食，飲品同其他主菜就額外收費，但都有飲品買一送一同主菜半價，食多食少可以自己控制！炸雞口味有甜酸、蜜糖芥末香蔥、香草青檸、辣味、檸檬柚子、濃蒜、黃金鹹蛋炸雞同最新嘅黑糖炸雞，黑糖炸雞值得一試，係香脆炸雞上面淋上黑糖醬同玉米脆片，入口少少焦糖炭香味同蜜香，配埋新鮮炸起嘅炸雞，夠哂邪惡！焗雞就有蜜糖蒜香、韓風紫菜、噴火辣、黃金鹹蛋、雙重芝士同BBQ香辣焗雞，個人推測噴火辣焗雞同蜜糖蒜香焗雞，噴火辣辣度夠超過癮！今日嘅薄餅限定口味係熱帶風情，係薄批底幾香脆，面頭熱辣辣嘅芝士仲要可以拉絲，不過一次過就要落4件，唔想浪費要落單前諗吓自己食唔食得落。小菜都有好多選擇，個人最鍾意韓式涼拌海蜇同紫菜薯條，前者口味偏甜辣，非常惹味，後者新鮮炸起好香脆！