喜鍋 海鮮‧火鍋‧小廚 (已結業)

一直都好想去試吓旺角嘅喜鍋火鍋店，今次就同兩個朋友入去食晚餐打邊爐。店員服務態度親切，隨即向我們推介餐廳招牌火鍋湯底-招牌花膠鯊魚骨膠原湯底，除此之外，仲有雞煲等等選擇。喺Facebook上面嘅專頁簽到同埋打卡，就有一客小食送，小食就係木耳青瓜前菜，味道酸酸辣辣，非常開胃。等火鍋來嘅期間，店員就俾咗六款醬汁配料我哋自己混醬，包括有新鮮蒜蓉粒、蔥粒、炸蒜同埋我最鍾意嘅辣椒粒等等，仲有茶水供應添。火鍋湯底好大鍋，而且見到入面有好多鯊魚骨，食落去有一粒粒脆口嘅口感，配以甘香泡飯混入湯底一齊食，仲更加滋味。四寶餃一向係我至愛，每一次打邊爐我都會叫，呢度嘅餃子非常大隻，而且皮薄饀靚，非常足料。雲吞入面嘅大蝦好大隻，點小小豉油一齊食更加滋味。順德漁腐非常入味，湯底嘅精華味道滲入漁腐，唔需要點任何醬汁已經好入味，食落去口感軟林林，入面仲有好多魚肉添。除此之外，我哋仲叫咗頂級安格斯牛頸脊、手打墨魚丸同埋油麥菜，每樣火鍋配料都非常新鮮。總括而言，店員服務態度親切，而且餐廳座位環境舒適，最重要係食物非常新鮮，火鍋湯底多選擇，值得一試。