一汁一菜 (中環街市) (已結業)

放工想行左陣新開既中環街市之後買個外賣返屋企食，天氣轉涼又想飲下暖暖既濃湯，見到呢間ICHIJUISSAI 有湯選擇，就試左呢度既咖哩飯套餐。套餐唔想要飯可以轉包或沙律。濃香牛肉野菌咖哩飯，睇佢細細杯咁，但牛肉(食落似係腩位)都有5嚿左右，每件都大大嚿，佢既咖哩亦唔係好辣個隻，香帶微辣，汁係較厚身，真係日式咖哩既感覺。飯係寫明用日本米，珍珠米再加少少芝麻，撈埋個醬就好惹味，送飯食一流食到舐舐脷。餐湯配左法式龍蝦濃湯，面頭有少少cream做點綴，飲落香濃滑溜帶咸香同埋鮮味，仲會食到龍蝦肉粒，飲湯之餘又有龍蝦𡁻下非常唔錯和風蕃茄雞肉咖哩飯，個人鍾意呢隻既汁多D，因為佢個汁味道冇咁濃但帶點清甜，較前者開胃，雞件嫩滑冇骨，好想剩D汁再點包食。另外餐廳仲有豚肉新品快將推出，下次要再試先得。