好好便當 (已結業)

因為要開會所以嗌外賣，留意到呢間台式便當，於是就試下。😀我就試咗台灣香腸香菇肉燥伴烏冬，佢仲有米線揀。佢用嘅烏冬係平時打邊爐好普通嗰隻，唔太好食，不過勝在佢嘅肉燥夠濃味，蓋咗個麵唔好食嘅部份。而且佢啲肉燥真係有冬菇粒，都有誠意。而個台灣香腸都偏咸，不過烤得幾香，有台灣香腸嘅風味。可能因為太濃味，所以食完會好口渴。🥵朋友就嗌咗大大塊雞扒便當，都真係幾大塊，不過可能因為外賣所以淋哂，有啲可惜。佢嘅雞扒正正常常，唔算有驚喜。仲有墨魚春卷都一樣係淋哂。反而鹵水雞腿🍗就無事，幾好食😋。如果食呢間都係建議堂食，咁啲炸嘢應該會酥脆同新鮮啲。