燒肉 帝 (已結業)

上次去過康城商場之後,發覺泊車好方便，又有好多食肆可供選擇，今次嘗試燒肉店，位置係喺3樓，aeon旁邊。今次選擇左食$488澳洲和牛放題，除咗澳洲和牛外，點餐紙仲有一啲海鮮可以選擇。好似有虎蝦、扇貝、廣島蠔….呢隻蝦真係好大隻，肉質鮮甜，扇貝加上牛油燒，更加惹味。食完海鮮之後，餐廳一早預設一盤精選澳洲牛肉俾我哋品嚐，內裏包括有肉眼頂、三角肉、肩肉一口牛，由於三款都係細細塊，好容易就燒到，一個人都食成三盤回晒本🤪原諒我分唔到肉眼頂同三角肉，一食落去就知道係靚牛，鮮味充滿肉汁，牛味濃，如果夾住生菜食，感覺上冇咁邪惡。喺燒嘅等候期，都仲可以叫到沙律/炸物食，我仲飲咗個麵豉湯添。我比較鍾意食帝沙律，即係菜沙律加上芝麻醬。炸物方面即叫即炸，今晚指點嘅芝麻雞翼非常脆口，熱辣辣脆卜卜，正到不得了。另外一口芝士同埋芝士年糕一如以往嘅出色。值得一題，唔好諗住100分鐘食得好趕，我哋食咗一個鐘頭已經飽到食唔落，大家千祈唔好眼闊肚窄。後尾原來仲有甜品送，今次食咗海鹽荔枝雪條，10分滿足嘅一晚。