潮江春 (怡和大廈) (已結業)

美心中菜唔係話超級高水準，但整體質素都唔錯，而且水準穩定，所以中環呢間潮江春中午都長期好多人，好多時訂咗位都要等一陣。今日又來食晏，等左唔夠10分鐘就有枱，算快架啦！一坐低，侍應就拎左功夫茶俾大家，每人小小一杯，茶香濃郁。然後，我們把握時間落單，今日一行四人，叫咗滷水鵝片、炒菜苗、潮式煎麵、XO醬炒蘿蔔糕、蝦餃同埋另外兩三個點心。食物出得好快，落單冇耐就有嘢食，啱晒香港人嘅節奏鵝片切得厚薄適中，滷得嫩滑入味，滷水汁濃味而不過咸，好好食。可惜份量唔算太多，除咗面頭一層鵝片，下面墊底嘅就係滷水豆腐了。蝦餃亦唔錯，皮夠薄，不過略嫌個餡太多肥豬肉，蝦嘅份量相對少咗啲。XO醬炒蘿蔔糕係次次都會點嘅食物，蘿蔔糕切粒煎香，加上微辣嘅XO醬，惹味又好食！黃金煎麵係潮江春嘅必食推介，雖然頗為油膩，但個麵的兩邊都煎得香脆，麵質爽滑，撈埋糖同醋一齊食，口感同食其他兩面黃係好唔同的！跟住再食埋個菜同其他點心，飲埋杯功夫茶消下滯，就匆匆忙忙咁埋單了，每人$160，以中環地段來計算，都算係一個價錢合理而食物又好食嘅午餐