大喜屋 (已結業)

今次就去咗銅鑼灣都幾出名嘅大喜屋食晚飯。食放題當然要叫返一碟刺身拼盤作為頭盤先啦, 啱啱遞完紙冇幾耐五六分鐘到就有得食, 因為我實在抵受唔住佢嘅誘惑, 大家都明個原因㗎啦, 所以相中嘅魚生係亂咗少少。拼盤上面嘅刺身真係夠晒份量, 尤其是三文魚同甜蝦, 三文魚就厚切啖啖肉, 甜蝦就好鮮甜同大大隻。 值得留意嘅係大喜屋有得叫蟹腳, 對於我呢啲鍾意食蟹嘅人嚟講係加分嘅。 每張枱都有兩把鉸剪, 方便大家開蟹腳嘅時候用。之後我就嗌咗一件炙燒左口魚裙邊壽司淺嘗, 試後十分支推介畀大家, 件左口魚擺落口係入口即溶, 而且仲有少少嘅橙皮嘅上面點綴下, 真心好食。呢個焗帶子, 帶子雖然細, 但係食得出佢落咗牛油同蛋黃醬仲有芝士嚟整嘅醬汁, 個醬汁唔會太濃亦都唔會蓋過帶子嘅鮮味, yummy😋之後都叫咗啲炸物, 包括芝麻雞翼, 榴槤炸彈, 炸年糕同炸蠔。當中炸年糕就外脆內軟煙煙靭靭幾好食, 炸蠔就十分之juicy, 食嘅時候小心辣親個口。以咁嘅價錢食到啲咁高質素嘅嘢, 算om啦, 期待下次再光臨大喜屋。