S2 鐵板燒 (已結業)

之前到過中環S2食過日本料理，呢間位於佐敦嘅S2鐵版燒，座位更寬闊、食物同樣亦有水準！每個套餐都先係開胃沙津杯作前菜，煙韌嘅鴨胸肉配以胡麻醬豆腐，感覺清新；而刺身三點件件新鮮滋味，大蝦充滿豐富嘅蝦膏，厚切嘅三文魚魚油味香濃！接著有兩味即燒海鮮，北海道黑松露帆立貝，脆皮燒鰻魚，前者帆立貝厚身而鮮味醇厚，加上黑松露更可以增添香味；而燒鰻魚同平時嘅處理方法有些微分別，煎整塊原塊鰻魚，令魚皮更脆身香口！今晚嘅重頭戲，海膽醬芝士原隻龍蝦，上枱時已經香味十足，加上海膽醬嘅芝士，有拉絲嘅效果，味道香濃，而龍蝦大大隻，所以肉身非常結實，啖啖肉嘅感覺令人滿足非常！最後有呢客紙包蜆湯，紫菜、豆腐、冬菇加上蜆肉嘅湯，清新而具鮮味，蜆肉無雜質，加上其他材料有淨化味蕾嘅作用添！