味道樂居酒屋 (元州街) (已結業)

今個週末聽見日本就嚟通關，很是興奮，想食日本大餐預先慶祝，就嚟到長沙灣食日本料理。叫咗一個滿滿幸福海膽丼套餐。個名改得真係啱，真係滿滿嘅幸福。先來一個前菜沙律，沙律有日本甜薯，絕不馬虎。再有一個燉蛋，下雨天食暖暖嘅燉蛋份外窩心。然後主角出場，係海膽丼。海膽同白飯之間係一層厚厚嘅吞拿魚蓉，再加以大量嘅蔥花點綴，旁邊再加一碗三文魚子，外觀已經近乎完美。海膽同吞拿魚鮮味十足，本身食壽司都會點豉油，但係由於三文魚子表面粘稠和脆弱，輕易戳破就會有卵汁流出，味道又鹹又甜，可以取代豉油嘅鹹味。每一口都有海膽，吞拿魚，三文魚子同日本飯，係滿滿嘅幸福感覺。