香葉越式料理 (已結業)

自從樂師執咗之後，好耐冇食過似樣嘅越南菜嘞...太太之前似乎對呢度有D偏見。我就覺得前身係佐敦八文樓西貢餐廳嘅呢度，絕對唔會差得去邊...琴日去百利攞相，呢度就係百利旁邊，因利乘便嚟開餐la..果然不出小弟所料，有相當水準...蟹肉三色蛋飯--- 查實唔止有蟹肉煎蛋，仲有香茅豬扒及一枝串燒蝦添。蟹肉煎蛋味道鹹鹹香香，真材實料，加入少許肉碎更添口感；豬扒就煎得比較乾，香茅味亦不夠濃，唔多得；蝦冇試，不過望落就幾好，起碼燒得燶燶哋，咬落應該幾香口...檬曉--- 差唔多係小弟去到越南菜館(如果佢哋有嘅話)必點嘅菜。料足，有青口、蜆仔、蝦、蟹、炸魚蛋等等，蕃茄味濃，反而蝦醬味不夠。都唔緊要la，有咁多嘅料，湯已鮮甜到不得了。食到最尾，用D飲剩嘅湯再撈落D食剩嘅飯入面，一樂也..^_^法式牛柳粒--- 加入黑椒粒，惹味；牛肉弄得相當juicy，冇經鬆肉粉洗禮下牛肉十分淰，食得相當愜意...美中不足係魚露較稀，唔入味，跟老趙嘅相差甚遠...太太食完後即時改觀，話要俾個笑臉佢...同意...