ラーメン天鷲 (已結業)

原本係對面等另一餐廳，但太多人，望到呢間好似唔錯就過黎。店舖入面有15個位左右，好好彩早入左少少，坐左陣就突然爆滿要排隊等位。落單時會順手收埋錢先，之後再等食。拉麵有四款揀，加$30有埋小食同罐裝飲品，我地兩個人就只係點左一個餐再額外一個拉麵。黑蒜豚骨拉麵 $85湯底香濃濃郁，加埋粟米甜味好好味，唔會好咸同好肥膩，所以今次我可以飲哂不過黑蒜味可以再多少少重味多少少咁就更Perfect。而拉麵係幼麵黎，夠彈口又掛得起個湯。叉燒咬落好香，肉質較為實淨有咬口個種。辛辣豚骨拉麵 $85辣味可以揀大中小，湯除左食到辣味仲食到豚骨鮮甜味，無比辣味蓋過左，非常惹味，兩個比，我會偏向鍾情呢個多啲。日式餃子 $30 (套餐)煎到個底好脆，唔太油膩，但就比較細隻，豬肉餡料，正正常常。