どストライク軒 (已結業)

來自大阪嘅Strike Noodles裝修好日式，食物質素非常高。我同朋友一共嗌咗兩款拉麵，白湯野菜醬油拉麵同白湯硯松露鹽味拉麵，兩款拉麵嘅份量都好多，啲麵唔會過林或者過硬，重點係湯底真係好正。白湯野菜醬油拉麵嘅湯底有好香嘅蒜味，有幾片好大片嘅叉燒，肥瘦適中，好林好有肉味，仲有一大片紫菜，好特別。白湯硯松露鹽味拉麵嘅湯底比醬油拉麵更加濃味，有雞肉同硯肉，所有餸都好入味。值得一提嘅係佢個半熟蛋做得好出色，蛋黃香得黎有醬油味，真係好好食。我地另外加咗個小明太子飯，雖然叫小但係其實份量都幾多，啲明太子唔會太鹹，撈埋佢嘅溫泉蛋、蔥同埋紫菜一齊食，真係好正。炸雞一共有四件，熱辣辣脆卜卜，炸粉一啲都唔厚，雞肉超級嫩滑，點埋佢嘅沙律醬同埋椒鹽，好好食。佢個白提子梳打好好飲，有好香果汁味，又唔會太甜，一邊食拉麵一邊飲梳打，超級嘆。希望下次可以試下佢嘅地獄湯拉麵啦。